Dewleta Tirk a dagirker û çeteyên wê 14 welatiyên ji gundên Ehres û Amiriyê yên li başûrê rojhilatê Serêkaniyê revandin.
Li gorî ajansa ANHA’yê çavkaniyên taybet ragihand ku dewleta Tirk a dagirker û çeteyên wê 14 welatiyên ji gundên Ehres û Amiriyê yên li başûrê rojhilatê Serêkaniyê yê dagirkirî û rojavayê navçeya Til Temirê ya girêdayî kantona Hesekê, revandine.
Heman çavkaniyan da zanîn ku bûyerên revandinê beriya 5 rojan û li gorî tawanbariyên bêbingeh, pêk hatine.
Hat ragihandin ku 14 kesên hatine revandin, birine cihekî nediyar û çarenûsa wan nayê zanîn.
Ji destpêka dagirkirina Serêkaniyê di Cotmeha 2019`an de, dewleta Tirk a dagirker û çeteyên wê li dijî şêniyên herêmê gelek sûc û binpêkirin kirine.
