Îro 3’yê Tebaxê, heftemîn salvegera fermana 73’mîn a li dijî Êzidiyên Şengalê ye, ku çeteyên DAIŞ’ê di sala 2014’an de bi piştgiriya dewleta Tirk, pêk anî. Zêdetirî 5 hezar jin dîl hatin girtin û çarenûsa gelek ji wan hîna ne diyar e, bi hezaran jin, pîr û zarok li pêş çavên cîhanê hatin kuştin.
Têkildarî mijarê, Kordînasyona Kongreya Star daxuyaniyek nivîskî da.
Kongreya Star di despêka daxuyaniyê de got: “Em wekî Kongreya Star a Rojava û Bakur û Rojhilatê Sûriyê, qirkirina Êzidiyan li Şengalê ku di 3’yê Tebaxê sala 2014’an de bi destê rêxistina têrorîst a DAIŞ’ê ku hewl da gelê kurd ji holê rake pêk hat, şermezar dikin.”
Kongreya Star di berdewamiya daxuyaniya xwe de bal kişand ser têkoşîa HPG`ê ji bo parastina Şengalê û got: “HPG’ê û YJA-STAR, YPG û YPJ bi însiyatîfeke mirovî rabûn û koorîdoreke mirovî ji bo Êzidiyan ji vê qirkirinê rizgar bikin, di navbera Şengal û Rojava de vekir. Bêyî ku hêzên pêşmergeyên Başûrê Kurdistanê bikevin nava tevgerê.”
Kongreya Star anî ziman ku heta niha û di salvegera 7`emîn a vê qirkirinê de, ne hikumeta Iraqê û ne jî hikumeta Başûrê Kurdistanê ji bo parastina hebûna Êzidiyên li Şengalê bi tu însiyatîfê ranebûn.
Kongreya Star bang li Neteweyên Yekbûyî, Meclisa Ewlehiyê, Yekitiya Ewropayê û civaka navneteweyî bi giştî kir ku qirkirina 3’yê Tebaxê sala 2014’an ku li Şengalê rû da û Rêveberiya Xweser a ku parastina hebûna civaka Şengalê dike nas bike.
ANHA
