ManşêtNûçe

Pierre Laurent şandeya Rêveberiya Xweser li Parîsê pêşwazî kir

Daîreya Têkiliyên Derve ya Rêveberiya Xweser ragihand ku cîgirê serokê senatoya Fransayê Pierre Laurent, hevserokê daîreyê Ebdulkerîm Omer, nûnerên Rêveberiya Xweser ên Ewropa û Fransayê Ebdulselam Mistefa û Xalid Îsa li Parisê pêşwazî kirin.

Li gorî malpera fermî ya Daîreya Têkiliyên Derve ya Rêveberiya Xweser, di hevdîtinê de rewşa giştî ya Bakur û Rojhilatê Sûriyê, dorpêça li ser herêmên Rêveberiya Xweser, gefên ku heta niha şaneyên DAIŞ`ê çêdikin ku hemwextî gefên dewleta Tirk ên dagirkeriyeke nû pêk tên, hatin nîqaşkirin.

Li gorî malperê, şandeya Rêveberiya Xweser di hevdîtinê de pesnê însîyatîfa parlamenterên fransî û endamên senatoyê da ku banga girtina qada hewayî ya Bakur û Rojhilatê Sûriyê û naskirina Rêveberiya Xweser kiribûn.

Pierre Laurent jî careke din hevgirtina xwe bi Rêveberiya Xweser re anî ser ziman û piştrast kir û diyar kir ku têkoşîna pêkhateyên Bakur û Rojhilatê Sûriyê ya li dijî DAIŞ û rêxistinên tundraw pîroz dibînin.

Cîgirê serokê senatoya Fransayê Pierre Laurent diyar kir ku divê pêşiya êrişên li dijî Bakur û Rojhilatê Sûriyê bê girtin, ji ber ku dê trajediyên mirovî çêke û her wiha dê tenê DAIŞ jê sûdê wergire.

ANHA

Back to top button